估唔到9年前將呢個香港停車場資訊網站借用停車場德文Parkhaus命名，今日真係黎到全世界最多「Parkhaus」既地方
無錯，大家都只需要買張機票，都可以黎到全世界最多「Parkhaus」既德國。憑香港國際駕駛執照(連同香港駕駛執照)，喺德國都可以自駕遊，於Autobahn上地板油，體驗一下極速同埋試下自己最快可以去到幾盡……
小弟就玩盡啲，喺速度方面就一定輸比各位，上次行到182km/h已經由快線返入中線，感覺下部車高速行駛時有幾定就算。唔係為興趣，而係被逼幾廿歲人再考私家車，仲要係德國 既私家車牌。我唔敢講係世界上最難既考牌國家，但我相信都算係最難國家之一。
例如筆試要熟讀1300條MC題目，包括掛接車輛知識。而筆試會考30題，總分數需達90%或以上；路試則沒有特定路線，大約40分鐘的考試時間，除非聽到指示向左走或向右走外，其餘時間按實際路況一直向前行，但見到不准進入或只限居民進入等路口均須自行避開。任何大錯即時丁丁，落車由師傅揸返考試場地。路試會考埋高速，不慢於100km/h為佳。
雖然筆試考左兩次，但好幸運地路試只需要一take pass。不是完美無瑕，但係所有駕駛反應都係合乎考官期望之內
點解要考德國車牌？因為登記左做居民六個月後，就不能用國際駕駛執照，無論如何都只可以用本地駕駛執照。而好不幸地，香港車牌無法對換德國車牌，所以只可以重新考過。
點解登記左做居民？可能因為同德國有緣，18年前喺德國公司做，個人懶又無特別轉工，中途又整左個Parkhaus.hk 泊好先(關乜_事)，疫情期間亦搜購過德國口罩同長效消毒噴霧畀大家，之後又喺歌德學院讀左兩年德文考到A2(僅足夠生存程度) ，最後因緣際會調職埋去德國。
所以，從今以後呢度會變左德國台，有咩關於德國既問題都歡迎問下!
